政情：與房協CEO同名 黃傑龍無辜捱鬧
遇上同名同姓嘅人並唔係乜嘢新奇事，不過有時就可能會造成困擾。叙福樓集團執行董事黃傑龍（Simon）最近因為同香港房屋協會行政總裁黃傑龍「撞名」而被點錯相。話說現屆政府早前邀請房協研究將郊野公園邊陲用地開發作建屋用，Simon自爆就收到網民留言鬧佢有份破壞郊野公園，Simon其後回覆對方稱自己只係一個「酒樓佬」，唔係好識呢啲嘢，後來對方發現擺烏龍，先同Simon講番唔好意思。
網民轟有份破壞郊園
除咗網民試過搞錯，連傳媒都試過將Simon同房協黃傑龍撈亂。Simon話，自己都認識房協黃傑龍，而且有喺公開場合碰過面，但就唔係好熟落，唔知下次會否用被點錯相捱轟一事打開話題呢？
另一方面，Simon本身都有唔少公職，加上要打理生意，所以都退出咗一部分公職。佢仲話，曾擔心違反擔任公職嘅「六六原則」，即指明唔可以連續擔任同一公職超過六年，或同時出任超過六個公職，因此每當政府委任新公職時，佢都要麻煩有關方面幫佢睇清楚喎。