政情：廠商會新會員激增投票權激辯
中華廠商聯合會（廠商會）會長李秀恒三年任期於今年底屆滿，今次會長之爭戰況激烈，有意競逐嘅副會長吳宏斌及徐炳光都呼籲各方友好入會，務求喺會董選舉中先贏一仗，結果合資格新會員人數激增近一千三百人，連同上屆有一千八百人有投票權，今次選舉合資格投票人數隨時突破三千人。據聞唔少商會中人都擔心商會領導層恐被大洗牌甚至出現變天，廠商會內部有人密謀提高門檻，提出規定會員需入會兩年先可以投票選會董，若想參選會董就要入會滿三年，惟有關建議一提出已遇上反對聲音。
據悉反對陣營認為，應維持入會半年即有機會投票選會董嘅規定，由於支持及反對陣營雙方爭持不下，最終決定交予本月底舉行嘅會董會議討論。按廠商會現有規定，每一屆選舉委員會有權制訂規則，從而確定會員投票嘅資格，入會六個月只係最低限度。
會董差額選舉比例高 恐礙運作
除咗提高會員選舉及被選舉權門檻外，會董差額選舉亦係爭拗嘅另一焦點，主流意見有兩個，一方主張差額百分之五，另一方則要求達百分之十五。據悉廠商會嘅會董原本有一百個名額，鑑於今次選舉情況激烈，早前廠商會已通過增加一成名額，即下屆會董共有一百一十人，加上有十二名今屆會董因唔同原因將會卸任，因此來屆至少有廿二個會董空缺，有分析指如果差額選舉比例太高，恐令大量現有會董被篩走，令下一屆會董會大換血，或不利商會嘅運作。
李秀恒兩年半使9000萬捱轟
相比其他城中幾個大商會，廠商會確係風波多多。早前有廠商會中人對李秀恒喺三年任內豪使七千萬表示不滿，李秀恒就解釋，佢喺上任時已率先注入一千六百八十萬元落廠商會社會服務基金，所以條數唔係咁計。不過聽聞最近廠商會向會董發放嘅資料顯示，李秀恒兩年半來已使咗近九千萬元，與前任會長施榮懷三年任期用咗四千幾萬、再前一任會長黃友嘉兩年任期只用咗五百萬元相比，差異極大。
再者廠商會每年靠工展會等招牌活動及服務，就有二、三千萬元嘅穩定收入，由此觀之，下屆會長參選人有必要明確交代一旦當選，如何運用廠商會嘅資源，始終做得廠商會會長於商界嘅一言一行都有番咁上下分量，隨着下屆會長選舉進入倒數階段，爭議風波會否有增無減，大家要拭目以待嘞！