中環出更：馬丘瀚如粵劇Look外國朋友Like爆
保良局早前喺北角新光戲院舉行慈善粵劇晚會，唔少董事局成員化晒妝、着戲服參與演出，其中副主席馬清楠太太馬丘瀚如都玩埋一份，佢話今次係首次做大戲，淨係化妝就要一、兩個鐘，直言好攰。不過佢將呢身扮相傳畀外國朋友，個個都Like爆，幾辛苦都抵番喇！
馬清楠聽到太太呻攰，即刻氹番話為咗慈善唔緊要，仲話依家中國國力強大，應該趁機多啲宣揚包括粵劇在內嘅中國文化至啱。咁佢下次會唔會親自粉墨登場？馬清楠就笑笑口話可以考慮，仲話佢可反串扮女仔，因為夠瘦喎！
陳細潔反串 家姐認唔出
當晚粉墨登場嘅仲有總理顧東華（William）及陳黎惠蓮，佢哋亦係晚會籌委會主席。William話今次係佢第三次化身粵劇人物，最辛苦係化妝時間長，加上擦咗三層粉後好熱，初初唔習慣，依家就「慣慣地」喇！佢太太及細女顧璇都有到場支持，William即刻話要同戲中女兒陳黎惠蓮及真女兒一齊合照，認真搞笑。
今次戲份係講述保家及良家兩家人去同天官祝壽，William係良家人，主席陳細潔就反串扮保家大少爺。陳細潔家姐劉陳小寶一見到女扮男裝嘅阿妹都認唔出，笑稱仲以為係粵劇名伶蓋鳴暉添！
啱啱卸任嘅保良局前主席郭羅桂珍同兒子郭浩泉都有到場支持，郭太話落莊後好忙，因為要返公司，不過就有覺好瞓，事關過去一年日日只瞓得五個鐘，依家可以瞓到八個鐘，好滿足。
卓妮