「我重罪人，得罪天主。今特為愛天主在萬有之上，專心痛悔，惱恨我罪，決意定改，寧死再不敢犯天主的誡命。」天主教徒告解時都要唸誦呢篇《痛悔經》，但如果好似壹傳媒老闆漢奸黎呢亭不肖教徒，鑊鑊「寧死不敢」，鑊鑊重蹈覆轍，上帝仲會唔會寬恕佢呢？
話說前晚漢奸黎參加天主教會舉辦嘅六四祈禱會，原本莊嚴肅穆嘅場合，點知條友突然發爛渣，大庭廣眾下爆粗辱罵正常採訪嘅本報記者，大大聲話「我實搞你」、「我影×咗你張相o架」、「×你老母×」。耶穌教落，「恨人如殺人」，家陣漢奸黎唔單止動怒，仲涉嫌出言恐嚇記者，係爭在未動埋粗，明顯犯咗十誡，等住受審判都得嘞。
講真，漢奸黎涉嫌兇記者呢單嘢，絕對唔單止「犯天條」咁簡單。正如有法律界人士話齋，任何人威脅其他人以致其人身安全、名譽、財產受損，又或者意圖令對方受驚，都有可能觸犯刑事恐嚇罪行。漢奸黎身為傳媒老闆，仲周不時寫文章扮晒文化人，居然開口埋口話要「搞」人，語氣口脗十足十黑社會收保護費不遂，又或者收數佬追債塞匙窿淋紅油，對方唔驚就假。掉番轉頭，咁受訪者對爛果報記者係咪又可以照辦煮碗？唔理點講都好，警方對今次事件高度重視，重案組已經接手跟進，有人嚟緊怕且都有排頭痕。
話時話，漢奸黎創辦嘅壹淫媒將狗仔隊文化引入本港，旗下刊物大玩扒糞抹黑，唔係摷人垃圾桶就係偷怕藝人換衫，歷年來不知做過幾多陰騭嘢。剃人頭者人亦剃其頭，依家終於輪到佢老哥成為畀人貼身監察，直頭天經地義；更何況本報記者採訪循規蹈矩兼罵不還口，專業表現有目共睹，漢奸黎咁都反面發老脾，古有「葉公好龍」，今有「黎公好狗」，簡直笑大人個口！正所謂冇鬼唔死得人，如果唔係漢奸黎自己其身不正，崇洋媚外，反中亂港，又怕咩畀人追訪吖？
上帝叫人滅亡，必先使其瘋狂。漢奸黎情緒失控絕對事出有因，事關條友臭史愈揭愈多，麻煩嘢一單接一單，黑金案調查如火如荼，作為佔中幕後黑手兼最大金主，落鑊亦係遲早嘅事。大家睇吓漢奸黎喺燭光晚會上，行又行唔穩，連坐都未坐得穩，幾乎當場四腳朝天，如果唔係食咗仙草，就肯定係神思恍惚驚緊收尾嗰幾年。
始終都係普京講得啱︰原諒恐怖分子係上帝嘅事，佢嘅任務係送佢哋見上帝。一句到尾，賣港漢奸一日存在，正義傳媒一日都會針鋒相對，禮送佢早日見上帝，阿們！