政情：患強直性脊椎炎 峯鴿估係遺傳病
近年於區議會多次有抗爭行動嘅民主黨立法會議員許智峯（峯鴿），早排發現自己起身就背脊痛，由起初一星期痛一次，演變成一星期痛幾次，最終病向淺中醫，發現自己患上強直性脊椎炎。佢透露，爸爸同叔叔都有呢個病，所以估計係遺傳病，又話據知如果情況嚴重係會搞到脊椎退化、鈣化或生骨刺，峯鴿引述醫生話好在及早發現，依家情況未算好嚴重，但建議要做啲運動，需要定時覆診，以及有需要時食止痛藥。
爸爸曾踩上區會「出頭」
峯鴿又提及父親向來好緊張自己，知悉佢患病後不時有致電問及情況，而最鮮為人知嘅一幕，發生於一四年，當時自己因不滿區議會涉及推廣《基本法》撥款，因而有抗爭行動，事後爸爸見狀直接上到區議會同當時嘅正副主席等人表達意見，峯鴿笑言，呢個情況就好似啲學生喺學校出事後，要家長去出頭咁，所以自此就呼籲爸爸唔好再上去嘞！