政情：葛珮帆批政府 有既定立場去做研究
港府近年時常被批評諮詢只係走過場，唔少政策措施一早已有腹稿，建制派立法會議員葛珮帆（EQ）更發現，政府委託顧問公司進行嘅部分顧問報告，有咗既定立場先去做研究，有關情況唔理想。
EQ舉例指，立法會早前討論規管美容儀器一事，對於依家有幾多間美容院嘅問題，結果係顧問公司做完報告都唔知道，佢表明對此唔能夠接受，直言唔應該畀錢呢間顧問公司。EQ又建議，政策局應有權搵大學喺各政策範疇作長遠研究，以及公開相關嘅數據，咁樣先能夠說服到市民支持政策。
鄭泳舜質疑家庭議會唔到位
同EQ一同出席爭取兒童權益圓桌會議活動嘅深水埗區議員鄭泳舜，則對於家庭議會嘅工作有意見，佢批評現時家庭議會以數以億計嘅錢去做宣傳教育同搞活動，例如參觀博物館就當係一個家庭活動，加上目前地區已搞類似活動，質疑有關工作唔到位。