中環出更：晚會籌款 泛民政黨被質疑「消費六四」
前日係六四事件廿八周年，支聯會一如既往舉行六四維園燭光晚會，但參與人數只有十一萬人，創出九年來新低，連帶支聯會、泛民三大政黨即公民黨、工黨及社民連趁六四籌款嘅數字都全線下跌，值得留意嘅係，唔似民主黨表明六四當日只為支聯會籌款，公民黨及工黨只願意把所籌得款項嘅十分之一撥予支聯會，難怪被人質疑旨在為所屬政黨「吸金」，本身有「消費六四」之嫌。
支聯會籌得140萬
支聯會、泛民多個政黨、本土自決派前日於銅鑼灣、天后一帶擺設街站，向參與六四晚會嘅市民籌款，總結所籌得嘅款項，支聯會收到約一百四十萬元捐款，較去年嘅一百七十四萬為少，而泛民其他趁機「吸金」嘅政黨，據知均籌得廿萬以下，分別是社民連籌得十八萬八千元、公民黨籌得十六萬元、而自決派議員劉小麗牽頭嘅「小麗民主教室」則籌得八萬元，工黨更只籌得三萬八千元。
至於泛民多個政黨籌得金額會否撥出一定比例予支聯會，據報公民黨、工黨會將所籌款項嘅十分之一撥予支聯會，但推算涉及金額分別為一萬多元及數千元，至於其他泛民政黨暫未有作明確的交代。
其實早年嘅六四燭光晚會，泛民各黨派於六四當日只會為支聯會籌款，但之後疑有人「做壞規矩」，自此泛民多個政黨除咗七一外，連六四當日亦趁機「吸金」，自此被外界質疑有「消費六四」之嫌。
卓妮