中環出更：衣架顏色有講究 隨時影響銷情
網上不時有人比較各大型服裝連鎖店試身室嘅鏡有咩唔同，照得個身形靚啲固然可以吸引多啲客人購物，除此以外，做開衣架生意嘅香港青年工業家協會副會長戴麟（Paul）透露，原來唔同顏色及尺寸嘅衣架，亦會影響銷量，真係大有學問。
香港青年工業家協會日前舉行二十五周年銀禧盃，講起工業界要升級轉型，Paul話，市民嘅消費習性及零售模式改變，同工業發展息息相關，好似現時多咗唔少網店賣衫，實體店要吸引顧客眼球亦有「竅妙」。
連鎖店衣架有顯瘦效果
佢透露，好多店舖近年就鍾意轉訂造米色或灰色嘅衣架，因為用太深色或鮮色嘅衣架可能會喧賓奪主，而衣架大小亦有學問，要配合唔同類型嘅衫，加上根據最理想嘅身形尺寸設計，有啲連鎖店嘅衣架設計仲會有顯瘦效果，即使係大碼內衣褲掛咗上去嘅視覺效果，睇落都會好似細碼咁，呢個做法對銷量絕對有正面影響。
協會執委林曉盈及副會長陳嘉賢均認為，傳統工業要轉型就要發展O2O，即線上營銷帶動線下消費的模式，除咗為工業打好品牌基礎外，加入設計及個人化元素亦係大勢所趨。
同場仲有協會副會長張益麟及香港工業總會主席鄭文聰，對於美國總統特朗普早前宣布退出《巴黎氣候協定》，相反中國繼續加強減排工作，張鄭二人認為，此舉或對中國未來發展有利。
呢日出席活動嘅仲有協會會長張傑、副會長陳婉珊、廖錦興及執委陳家偉等人，其中陳婉珊剛去完不丹趕返嚟，原來佢已經第六次去不丹，因為鍾意當地人夠熱情簡樸。
卓妮