話說三國時代魏明帝下詔求賢，痛斥當時只重清談，不務實際，互相吹捧嘅浮誇官風，強調「選舉莫取有名，名如畫地作餅，不可啖也。」睇番今時今日班港產官僚，一味坐而論道，講咗就當做咗，大嶼山發展由老董年代講到依家，十幾年過去仍然得個吉，正正係「畫餅充飢」嘅典型例子！
呢，港府尋日公布「可持續大嶼藍圖」，提出所謂「北發展、南保育」嘅方針，當中北大嶼山會將東涌新擴展區、小蠔灣以及填海得嚟嘅「東大嶼都會」發展成住宅區，預計長遠可容納七十萬至一百萬人口；又會以機場及港珠澳大橋作為落腳點，目標係成為本港第三個經濟發展核心區，預計可提供二十萬個職位，至於南大嶼山就會興建海岸公園同保育區。
講就講到天花龍鳳嘞，但咪畀人睇死，到最後又係煲無米粥收場。大家有眼見，九七後歷屆政府都話要發展大嶼山，而且由打造商業購物城到發展橋頭經濟，口號一個比一個響亮，目標一個比一個宏偉，但幾時落實過o架？唔使講咁遠，港府前排至提出以纜車接駁大嶼山、喺大東山增設觀星設施以及發展水療度假區，點知話口未完，土木工程署官僚尋日走出嚟叫停，話計劃可能性較低喎。好明顯，官老爺當初冇經過論證，完全係山草藥噏得就噏，家陣吹水話打造咩經濟發展核心區，搵鬼信咩？
最離譜嘅係，成件事十劃未有一撇，當局已經急不及待要人要錢，短期內將會向立法會申請撥款開設可持續辦公室，話要解決缺乏統籌、效率低下等問題喎。政出多門，互相扯皮冇錯係港產官僚嘅頑疾，但睇吓呢幾年跨部門嘅樹木辦做過乜，就知疊床架屋無補於事，只會將公帑倒落鹹水海嘅咋。
話時話，大嶼山面積比香港島大一倍，人口不足十分之一，原本係一塊未經雕琢嘅璞玉，發展潛力無限，問題係當地基本設施多年來毫無寸進，早排當局突然開放外來車輛自由行，結果搞到七國咁亂，險象環生，引發居民堵路抗議。所以話，港產官僚化神奇為腐朽，市民真係多得佢哋唔少。
唔怕唔識貨，最怕貨比貨。同樣係彈丸之地，同樣面對土地發展問題，人哋新加坡可以透過填海增加供應，點解香港做唔到？除咗兩地政治社會環境有別，最主要都係因為港府弱勢無能。
難為最近香港被國際機構評為全球最具競爭力經濟體，港府好似執到寶咁，起勢自我貼金，其實只要睇吓大嶼山發展十幾年原地踏步，就知道呢啲只不過「畫地作餅，不可啖也」嘅虛名咋！