政情：醫醫相衞亂鬧人 陳肇始 麥美娟無辜做箭靶

去年上屆立法會審議用以改革醫委會，加快處理病人投訴嘅《二○一六年醫生註冊（修訂）條例草案》，最初獲包括泛民在內嘅大部分黨派支持，但喺部分醫生組織及網民壓力下，部分泛民轉軚，配合時任醫學界議員梁家騮發動長達三星期嘅拉布戰，令條例草案被拖垮。局方其後成立醫學界、立法會議員及病人組織三方平台商議修訂，新方案下月將提交立法會。

傳媒報道事故 蔡堅反怪罪

近日香港出現多宗醫療事故，包括聯合醫院開漏藥累好媽媽，同埋瑪嘉烈醫院為腎病少女洗血時刺穿動脈致癱，真係鑊鑊新鮮鑊鑊甘，畀全城鬧爆。不過公共醫療醫生協會就唔係咁諗，反而話批評佢哋嘅麥美娟借事故「抽水」，言論唔公允。蔡堅更加怪罪傳媒，話係傳媒報道將市民同醫生放喺對立面。日前杏林覺醒發言人黃任匡亦再點名鬧麥顛倒是非，以醫患關係嚟交換自己嘅政治本錢。

麥美娟被連番狙擊，就撰文話對黃任匡嘅「神邏輯」不能苟同，強調議員職責係為民發聲，協助病人及家屬作出申訴。議員及傳媒只係希望醫院及有關當局作出檢討，改善制度，避免不幸事件再次發生，而並非要針對醫生專業，雞蛋裏挑骨頭。

抹黑陳麥 力阻醫委會改革

其實除咗麥美娟，盛傳喺下屆政府會升任食衞局局長嘅陳肇始亦都成為被攻擊對象，話護士出身嘅佢雖然入政府前係大學護理學教授，但始終唔係醫生，未必壓得住場，甚至話佢未夠資格代表香港出席國際醫學會議，真係冇嘢搵嘢嚟講。講到尾，佢同麥美娟近日被抹黑同改革醫委會新方案不無關係。貶人褒己，究竟醫學界為呢場醫患之爭可以去到幾盡呢？