中環出更：龍友李秀恒 想攞獎多過頒獎
香港中華廠商聯合會（廠商會）及沙龍影友協會早前為今年舉辦嘅攝影比賽揭幕，好鍾意影相嘅廠商會會長李秀恒今次都會擔任比賽評審，不過攝影評判佢就做得多，原來佢嘅心願係可以做攞獎嗰個至真。
李秀恒近年走訪多個地方拍攝傳統節慶習俗，記錄咗好多少數民族嘅特色及珍貴一面，亦不時幫雜誌及大型活動拍攝，連廠商會及香港中華出入口商會啲會董都搵佢影過個人照添！不過佢就自爆從未攞過攝影獎項，仲話希望有朝一日佢係攞獎而唔係頒獎畀人喎！
徐炳光讚老婆影相靚過自己
同場仲有廠商會永遠名譽會長尹德勝、副會長徐炳光、史立德、行政總裁楊立門及著名攝影師翟偉良等。徐炳光笑言後生時諗住識影相可以追女仔，點知佢當年女朋友，即係依家嘅徐太影相仲叻過佢，影相自然變咗佢哋拍拖嘅活動，佢仲大讚太太每次影佢嘅角度、構圖都冇得彈，掉番轉佢影太太時就成日被太太話囉！香港天氣潮濕，早幾年佢拎番啲舊相機出嚟發現發晒霉，要拎去畀人清潔添！
不過依家手機咁方便，就算去旅行都唔一定要孭住部相機，用手機一樣可以影靚相，史立德早前去瑞士就用手機影咗好多靚景，所以今次佢哋攝影比賽都會設立手機組，夠晒與時並進。尹德勝就指，今次比賽主題除咗同香港有關，仲希望題材可以正面啲，而佢自己影相就鍾意影人同風景，笑言冇乜心機影雀鳥，因為要好長時間喎！
卓妮