《水滸傳》裏面吳用焗盧俊義上梁山，寫咗首「蘆花叢裏一扁舟，俊傑俄從此地遊，義士若能知此理，反躬逃難可無憂」，合起嚟即係「盧俊義反」咁解。今時唔同往日，現代人造反唔使再收收埋埋，好似康文署咁，「反共」反到雞乸咁大隻字寫埋出嚟，慌死冇人知咁，年輕人「造反有理」，家陣知點解喇。
有眼利嘅市民發現，康文署轄下尖沙咀公共圖書館地下同一樓嘅水牌砌字砌到亂晒大龍，唔少字體筆劃底面反轉。區區九個字之嘛，「尖」、「沙」同「共」三個字筆劃裏面嘅點被反轉，康文署仲話唔係帶頭「反共」？
你話幾離譜吖，圖書館本來應該係求知識、探文化嘅大寶庫，居然連水牌都錯字連篇，簡直教壞細路。有家長就講得啱嘞，公共圖書館唔少用家都係識字階段嘅小朋友，唔做好榜樣，好容易習非成是；有網民諷刺康文署「差不多先生」，真係一啲都冇講錯。
話時話，康文署管理圖書館甩漏多多，水牌寫錯字只係小兒科咋，中央圖書館就試過將幾十箱未開封嘅新書當垃圾送去堆填區，推廣文化嘅部門帶頭扼殺文化，都咪話唔諷刺；最慘係公共圖書館服務幾十年如一日，潮流興閱讀無紙化，康文署圖書館居然夠膽死「珍藏」大量3.5吋磁碟資料以至上世紀嘅電腦教學書籍，市民見到呢啲「古董」，唔知嘅仲以為入錯咗博物館吖！
講起康文署嘅糗事，真係三日三夜都講唔完。幾年前香港歷史博物館舉辦甲午戰爭圖片展覽，展出多幅版畫，點知當中居然混雜兩幅描繪日俄戰爭嘅作品。明明上面戰艦掛嘅係白底藍交叉俄海軍聖安德魯旗，同清廷北洋艦隊嘅黃龍旗相差十萬八千里，求其一個中學生都分得清楚，偏偏康文署官僚張冠李戴，結果當場出醜。既然康文署唔係推廣文化，而係推廣錯字或者錯圖，甚至摧殘文化，不如改名「文盲署」好過。
冇計喇，上樑不正下樑歪，睇吓特區政府班高官，一個二個語言粗鄙，胸無點墨，前有開口埋口「狗噏」、將「文革」當成「民主」嘅曾爵士，後有「五部曲」死都要寫錯做「五步曲」嘅林鄭。再加埋嗰個自稱每個月讀三十本書，但就連簡單句子都講唔清楚嘅吳得掂，一味識講「好靚」、「好正」同「真係好正」，呢啲廢官掌管香港教育，年輕人仲邊有希望。
都係古人講得啱，清風不識字，何故亂翻書。做人貴乎自知，港產官僚冇咁大個頭戴咁大頂帽，附庸風雅搞西九文化區，唔變大白象至奇喇！