樂天又可愛嘅少女，當然比終日愁眉苦臉嘅女人吸引，唔係因為冇同情心，而係男人都鍾意充滿正能量嘅女生，好似南韓人氣模特兒崔智惠咁，散發出調皮活潑嘅陽光氣息，同時兼具迷人樣貌同火辣身材，試問又點可能唔深得男士嘅歡心呢？
女人總係唔明白點解男人鍾意樂天嘅女生，其實道理好簡單，皆因係男人都怕煩，而要煩嘅嘢已經相當多，仲要見到愁眉苦臉嘅另一半，梗係想將對方踢開啦，難怪呢位喺首爾出生嘅樂天派模特兒崔智惠甫出道，即時引起男士們嘅注意。論模特兒經驗，佢真係相當豐富，事關早喺2007年已經開始職業模特兒工作，最初主要替雜誌拍攝硬照，憑住可愛又甜美嘅樣子及勻稱身材，深得攝影師歡心，加上佢經常展露笑容，有別於冷艷形象嘅模特兒，令作品充滿溫暖又窩心嘅感覺，正正係呢個原因，佢好快就冒起。
之後佢踩入車模界，喺汽車節以車模身份登場，呢次演出不但成為展場上嘅焦點，更令佢人氣直線飆升，而佢亦食住個勢，喺南韓舉辦嘅超級跑車大賽中，化身成賽車女郎喺賽道上現身，性感嘅賽車制服加上迷人嘅笑容，令唔少人對佢留下深刻印象，陽光活潑形象更係深入民心。自此以後，不但喺賽道上，更喺多個大型車展中見到佢嘅身影，而每次佢總會成為攝影師爭拍嘅焦點。之後，佢為咗挑戰自己，參加南韓賽車女郎大賽，憑住淡定表現，結果贏得冠軍。
成功奪冠後，崔智惠嘅人氣可以話破天荒咁高，工作更係接極唔停。不過阿妹同其他模特兒唔同，並非經常以性感造型示人，除非工作需要，否則鮮有展露誘人嘅事業線，只會以甜美笑容打動大家，唔通佢對性感係有要求嘅？原來大家誤會咗佢，實情係佢一啲都唔覺得自己嘅身材有睇頭，加上佢認為模特兒工作並非賣弄性感，而係應該透過自身嘅魅力，吸引大家注意身邊嘅展示品。至於喺平面攝影中，佢覺得如果只懂賣弄性感嘅話，反而會影響咗大家對佢嘅觀感，與其係咁，點解唔盡力喺其他方面做好自己呢？當然如果有需要嘅話，偶爾性感一下都無所謂。
有人問佢既然喺模特兒界打滾咗一段日子，人氣亦高企，點解唔挾住優勢轉戰網絡直播，又或者向娛樂圈發展呢？佢笑稱自己係個思想簡單嘅人，每次只能專注喺一件事上，如果叫佢同時作多方面發展，反而會感到好大壓力，亦會做得唔開心，所以無謂自尋煩惱。另一方面，佢亦好享受依家嘅工作，化身成車模、賽車女郎同攝影模特兒，覺得呢種工作更加適合佢嘅性格。
簡介：崔智惠每次登場，總會散發出正能量畀大家，皆因佢全身都充滿陽光活力，加上甜美笑容，仲有古靈精怪嘅表情，即使心情幾差，見到佢嘅時候，都會令人忘卻煩憂。如果大家想欣賞多啲阿妹嘅靚相，就要Click上呢個網站睇睇啦！
網址：http://cafe.daum.net/jihyanglove
出生地：首爾
身 高：168cm
三 圍：33、23、34
撰文：魂