政情：收料站：白鴿入熱廚房 未必要退黨？
新一屆問責班子將於七月一日上任，外間盛傳民主黨（白鴿黨）成員、扶貧委員會轄下關愛基金專責小組主席羅致光，有機會出任新一任嘅勞工及福利局局長，但一直都未有正式公布。本身係資深老鴿嘅羅致光要加入政府，按照慣例要退出白鴿黨，不過有老鴿就提出該黨未來或者有更多人會加入政府，未必下下都要退黨，不如只凍結黨籍就算。
自林鄭月娥在特首選舉勝出後，政圈一直有傳過去同林鄭喺扶貧議題上「拍住上」嘅羅致光將會入閣。羅致光尋日再喺電台節目被問到入閣傳聞，同埋幾時申請退出白鴿黨，佢都話唔會回應，但就話下屆政府行政立法關係改善，減少無謂爭拗，延續及加快福利和房屋等福利政策規劃係普遍期望。
羅致光惹討論 或只凍結黨籍
雖然羅致光一直未有就入閣表態，但白鴿黨已就此進行討論。有老鴿就提出建議，認為該黨未來或者有更多人會加入政府，未必下下都要退黨，不如只凍結黨籍；但該黨主流派仍然認為「朝中有人」或者會令該黨需要為政府嘅施政負責，傾向羅致光若加入政府，必須退黨。
有白鴿黨高層透露，羅致光暫時未遞交退黨申請，但佢強調退黨時間可長可短，好似上次該黨前副主席狄志遠遞交退黨信後，中委會都即時接納，預料今次都會開快車。至於有白鴿黨「大腦」之稱嘅羅致光，退黨之後料同白鴿黨會保持良好關係，希望可以令行政、立法關係有較顯著嘅改善。