政情：打龍通風波 特首辦邱萍菲(子貝)黑鑊
特首梁振英（CY）同民建聯議員周浩鼎就立法會UGL調查「打龍通」風波，並未因周浩鼎辭任UGL專責委員會職務而平息，民主派已表明會提出動議，彈劾及譴責兩人。有政府中人認為，除咗CY同周浩鼎須為自己行為負責，懷疑負責處理涉事文件嘅特首辦特別助理邱萍菲亦要孭鑊，政治生涯隨時就此打上句號。
喺親中報章做政治記者出身嘅邱萍菲，在一四年獲CY招攬出任月薪高達十四萬元嘅特首辦特別助理，主要就係睇佢熟悉立法會運作同埋與一眾建制派議員相熟，可從事某啲一般公務員以至問責官員都唔適合處理嘅政治聯絡及游說工作。據聞，政府內外本來都覺得佢表現不俗，有多個政策局力邀佢喺七一後加盟出任局長政治助理，若果適應得好，估計好快就可以好似另一前特首辦助理陳岳鵬般升任副局長。
文件未刪敏感字眼釀風波
好景不常，近日發生嘅UGL打龍通風波，就將邱萍菲由天堂打落地獄。事緣周浩鼎向UGL專委會提交嘅調查範圍建議文件電子版，除咗顯示曾有名為「CEO-CE（特首）」嘅使用者修改過，文件嘅建檔者顯示為「CEO-SA」，亦即特首辦特別助理嘅英文縮寫。
雖然邱萍菲接受傳媒查詢時，聲稱自己只曾喺網上下載該份文件，唔清楚之後有乜嘢人修改過。但不少政界及政府中人都已認定，該份文件經CY修改後，係透過專責同建制派聯絡嘅邱萍菲，傳送到周浩鼎以至更多建制派議員手上；唔知邱萍菲係政治敏感度不足抑或缺乏IT知識，冇將自己及老細（CY）嘅蛛絲馬迹喺文件上刪除，再加上周浩鼎或其助理亦未將有關文件重新編寫過，就直接轉送畀立法會秘書處，先會引發今次風波。
多個政策局褪軚拒招攬
據聞風波爆發後，各個原先有意招攬邱萍菲嘅政策局都紛紛打退堂鼓，以免接收咗佢之後會惹嚟政治麻煩。候任特首林鄭月娥上台後，相信亦唔會畀邱萍菲留任，以便同上手留低嘅UGL風波完全切割。邱萍菲最後可能只能重返原屬嘅親中報章或其他左派機構工作，並且難免要大幅減薪。