中環出更：楊哲安自封絕種怪獸家長
教育局前政治助理楊哲安（Jeremy）自從離開熱廚房後，就加入獵頭公司工作，但佢就話工作同教育仍然有關係，好似早前成功為香港名校尋找校長人選就帶畀佢唔少滿足感。另外，佢仍然非常留心香港教育問題，仲話自己係怪獸家長，但係絕種嗰隻喎。
Jeremy話估唔到身邊唔少朋友生兒育女後會化身怪獸家長，變得只注重子女學業成績，認為呢個現象同唔少家長遲生育、生得少有關，令到小朋友萬千寵愛在一身。
囡囡跑唔停 出腳整跌佢
至於佢嘅教育方式就係注重身教，而且盡可能令囡囡保持童真。咁點解會自稱「絕種怪獸家長」呢？佢解釋，因為想囡囡撞板，更透露有次囡囡周圍跑叫唔停，佢竟然特登出腳整跌囡囡，希望佢明白周圍走會騷擾到人，出到奇招又真係絕種喇！
佢仲話呢個教育方針同爸爸有關，透露當年同哥哥都未夠十歲，但已被要求用地圖同指南針帶父母行山，而父母完全唔畀提示，行錯就一齊錯。睇嚟佢好欣賞呢種教育方法喎。
卓妮