飲食界立法會議員張宇人（Tommy）早年因為建議最低工資訂為二十蚊， 結果被封為「廿蚊張」，佢一直對呢個花名好抗拒，有人喺佢面前提起都會黑面。不過，Tommy尋日喺電台同有醫生背景嘅議員郭家麒激辯醫委會改革，火藥味勁濃，期間郭家麒話自己唔會人身攻擊，所以唔會叫Tommy做「廿蚊張」，點知Tommy立即回應反擊：「唔係呀，我係廿蚊張呀！」仲話郭家麒掩蓋唔到佢正義嘅聲音添。為嗌交甘願自認係「廿蚊張」，估唔到Tommy可以去到咁盡嘅。
