政情：周浩鼎牽頭立會組七人欖球隊
球類運動多籮籮，不過多年嚟立法會議員只組咗一支足球隊，其他運動團隊欠奉。近日建制派同民主派議員就聯手成立七人欖球隊，由議員周浩鼎（Holden）牽頭，仲已去信立法會行政管理委員會申請添！不過有議員就潑冷水話，欖球咁冷門，都唔知有冇人同佢哋打，又話議員年紀有番咁上下，落場唔知會唔會撞散喎！
由非撞式開始
七名球員之中，建制派有Holden、廖長江及劉業強，民主派就有譚文豪、楊岳橋及羅冠聰等人。Holden話欖球有分十五人同七人一隊，仲有撞擊同非撞式。佢哋計劃成立七人球隊，由非撞式開始，所以唔使怕撞散。
譚文豪都話，香港七人欖球賽喺外國好出名，佢喺澳洲偏遠小鎮讀中學時，當地人都知香港嘅七人欖球賽，佢亦係嗰陣開始迷上點到即止嘅非撞式欖球。佢又話，雖然議員政治立場唔同，但對於值得推廣嘅嘢，都應該起帶頭作用齊齊推動喎！