政情：童年獲贈母豬林正財悟扶貧真諦
古人有話授人以魚不如授人以漁，安老事務委員會主席林正財細個嘅時候亦有類似經歷，不過佢就唔係獲贈魚，而係一隻母豬。林正財尋日出席一個活動時，自爆細個嗰陣屋企住喺錦田嘅泥屋，生活困難，多得嘉道理爵士送咗一隻母豬畀佢哋，一家人先可以自力更生，有尊嚴咁生活。佢認為呢個先至係扶貧嘅真諦咁話。
林正財係出席中華電力嘅端午節長者活動，佢話收到邀請時一口答應出席，全因自己一家受過嘉道理家族幫助，佢仲同在場超過二百名長者提早食糉過節添！
潘偉賢同幼園生齊齊派糉
出席活動嘅仲有中華電力總裁潘偉賢（Paul），佢係工程師出身，當日同一班着住工程師制服嘅幼稚園學生齊齊派糉，好趣致。班小朋友仲教長者唱咗幾句「慳電乖乖」，提醒佢哋夏天開冷氣時，溫度維持喺攝氏二十五點五度。