政情：孫公陳年爛攤累政府難組班
候任特首林鄭月娥久未完成組班工作，而近日更傳出組班現災難性重挫。曾任多年政府主要官員嘅教育局前局長孫明揚（孫公），尋日就化身「花生友」上電台解讀新政府組班困難原因。不過，香港目前面對好多深層次問題仍未解決，各項政策瓣瓣唔掂，好似房屋同教育兩大炸彈，其實都係孫公有份遺留落嚟嘅爛攤子，仲好意思指指點點？
林鄭月娥籌組新班子工作不時傳出觸礁消息，孫公就將新政府組班困難歸類出三大原因，分別係香港官員薪酬低、立法會議員對官員唔客氣，以及出任官員會被翻舊帳。無可否認，立法會議員的確難服侍兼惡死，皆因小小事就叫官員下台，又確係會令到有心或面皮薄嘅官員容易做到氣餒、心淡，甚至想劈炮唔撈。
不過，孫公話香港官員薪酬低而難以吸引人才進入官場呢個講法，就實在不敢苟同喇，因為香港官員薪酬絕對高過歐美國家，而且新一屆政府嘅問責官員薪酬已經比現屆官員高出十二點四個百分點，所以薪酬吸引力理應比以往更大囉。
司局長月薪比歐美領袖高
新政府三司嘅月薪高達三十四萬元至三十七萬元不等，連局長月薪亦高達三十三萬元，月薪比唔少歐美大國嘅領袖薪酬更高，好似美國總統月薪折合港元計算只約有廿六萬、德國總理月薪約十五萬港元、英國首相約有十一萬港元，所以薪酬低呢個原因都幾難成立喇。
至於驚被「翻舊帳」嘅原因就更無稽，雖然出任官員後要受立法會、公眾及傳媒監察，但若果官員入政府前一向行得正企得正，又怕咩驚被人翻舊帳呢？
然而，香港目前最棘手嘅房屋及教育問題，都同孫公過往工作有關，好彩佢都有自知之明，接受訪問時明言林鄭處理教育問題係執佢爛攤子，因為需要處理保留超額教師期限屆滿問題。不過，孫公嘅教育爛攤子又何止咁少呢，淨係教育問題就更加遺留咗國民教育獨立成科呢個大炸彈。
此外，曾經擔任房屋及規劃地政局局長嘅孫公，喺二○○二年宣布九項穩定樓市措施，其中一項極具爭議嘅就係停建居屋，實為引致現時天價樓市嘅主因，其施政失誤可謂遺禍至今。照咁睇，分分鐘係前朝官員留低太多棘手爛攤子，先令到人才卻步唔肯入官場執手尾都未定。