中環出更：嶺大學生會發聲明 狙擊何君堯「畜牲論」
身兼嶺南大學校董嘅立法會議員何君堯，早前被指暗喻爭取同志平權嘅人士為畜牲，惹來外界批評，雖然佢已澄清並非對性小眾不恭不敬，但仍繼續受到狙擊。嶺大學生會尋日就事件發表聲明，指何君堯已非首次攻擊及侮辱同性戀者，學生會對佢侮辱及歧視社會中嘅不同群體深感憤怒，並以其嶺大校董身份為恥，要求佢就事件公開道歉。
要求公開道歉
嶺大學生會喺聲明中指出，何君堯於本月二十四日喺立法會審議《私營骨灰安置所條例草案》時，以《中山狼傳》暗喻爭取同志平權嘅人士為畜牲，及後重申自己嘅言論並無不恰當，辯稱係「崩口人忌崩口碗」。聲明又指，何曾以「捍衞傳統」為藉口反對同性婚姻，並認為喺校內推廣尊重同性戀者嘅教育係社會倒退嘅例子。
學生會認為，香港嘅核心價值貴在尊重多元文化同自由，而尊重多元性文化正係其體現之一，但何君堯卻多次攻擊及侮辱同性戀者及爭取同志平權人士。該會嚴正敦促何君堯為自己嘅言行負責，就此事件作公開道歉，並承諾往後尊重社會上嘅不同群體。
卓妮