中環出更：盧文端教路綠茶秘方醫痱滋

盧文端話佢自細就成日生痱滋，每兩、三個星期啲痱滋就會嚟「探」佢。以前佢都係食啲消炎藥，不過食得消炎藥多對身體都唔係幾好，早排佢就得到一位耳鼻喉專科醫生教路，學識呢個綠茶加鹽療法，大讚消炎功效佳，康復得好快喎！

盧文端個仔盧金榮就扮投訴話，爸爸將痱滋遺傳咗畀佢，但係就收埋醫痱滋嘅秘方。盧文端笑笑口話佢唔係收埋啲秘方，而係等試過有效先教阿仔用啫！

楊孫西飲開大紅袍

楊孫西嘅次女楊莉瑤、兒子楊華勇同媳婦莊菲娜都喺度。楊孫西話自己體質屬寒底，所以不宜飲綠茶，平時都係飲大紅袍同普洱多啲。講起做茶生意，楊孫西話其實佢曾祖父嗰輩已經開始做茶，佢細細個都經常喺茶園玩。後來佢爸爸移民往菲律賓，屋企先賣晒啲茶園。多年前佢慢慢買番家族以前嘅茶園，依家先買番兩、三成咋！

盧文端（右）同盧金榮（左）大談醫痱滋秘方。（葉華英攝）

莊菲娜（左起）、吳蕙英同盧金治好啱傾。

同場嘅仲有中華廠商聯合會永遠名譽會長施榮懷同太太吳蕙英、立法會議員吳永嘉同太太盧金治。兩位太太被問到老公有冇試過飲醉酒返屋企時，不約而同話佢哋老公「好叻」，飲完酒返屋企都唔覺佢哋醉，不過第二日問番佢哋時就好似「斷片」咁，唔記得前一晚發生咩事囉！

卓妮