有關國泰航空嘅新聞，好似公立醫院嘅醫療事故咁，無奇不有，公立醫院就開錯刀、輸錯血、畀錯藥等，國泰航機故障亦然，不是引擎出現警示而要緊急折返，就是爆胎迫降、起落架液壓系統滲漏、緊急逃生梯突然彈出……
話口未完，日前一班飛往英國倫敦嘅國泰客機，飛咗三小時機師駕駛艙左前方玻璃出現裂痕，至甘肅上空被迫折返；而一架飛日本名古屋嘅客機，則出現液壓系統漏油。咁多離奇怪狀，難怪有人說，坐國泰機有如到冒險樂園，幾刺激都有！而我老友則表示，他已經捨棄國泰航空好耐，皆因唔想賭命，轉坐廉航，平靚正。老朽每次外遊亦必搭廉航，荷包慳啲，心情靚啲，延誤亦少啲。
講開又講，今趟國泰瘋狂裁員，勁炒六百人，之但係仲未止到血，皆因燃油對沖蝕到四腳朝天，加上乘客收益大跌一成，而管理層嘅「不合時宜及錯誤政策」卻要基層員工做替死鬼，難怪啲員工，不論是被炒還是仍然在職嘅，都感到心寒及怒氣難消！國泰勞資關係惡劣係人都知，隔三差五就會有工業行動，國泰嘅管理好明顯有問題。試想想，一間由英資引入香港，由名不見經傳的小航空公司，變成多次獲得全球最佳航空公司嘅殊榮，可惜真係應咗一句名言：剎那光輝不代表永恒！國泰的排名早已跌出三甲，昔日之光華，今淪為腐草，縱有流螢，其微亮一閃更令人不堪回首！
國泰如此血流成河的大裁員，也不過年慳五億元，相對於燃油對沖嘅虧蝕，三年錄得近二百億元，如何止血？據美銀美林估計，國泰今年仍有百分之五十一燃油對沖價格高達每桶九十美元，大大高出目前約五十美元水平，燃油對沖失利，已成為國泰揮之不去的夢魘。
依老朽看，一個機構老是吃老本，管理不善又不思進取，優勝劣敗，好應該被淘汰！