政情：中國籍身份惹疑 盛智文「基因」解困
有「蘭桂坊之父」之稱嘅盛智文（Allan Zeman）雖然有外國人的面孔，但就係「白皮黃心」，十年前放棄加拿大國籍，入籍中國，並持有香港特區護照。佢尋日出席一個午宴時自爆中國籍身份令佢到外地入境時出現唔少笑料，其中外國人嘅面孔、中國籍嘅身份令佢時常被出入境人員質疑，佢惟有解釋係「基因」問題。
當年提出由加拿大籍改為中國籍時，盛智文話唔少人都以為佢傻咗，佢用咗八個月時間去說服家人支持自己嘅決定，而佢亦明白唔少香港人都為咗外國護照可以「去死」，但佢對於香港有強烈嘅歸屬感，所以就堅持入籍。
過關時屢爆笑料
佢又話加入中國籍時出現好多笑料，例如當佢入境中國時，有入境人員要求佢走「外國人通道」，但佢其實係中國籍。另外，佢喺外地入境時亦有入境人員質疑佢嘅中國籍身份，佢惟有解釋係基因問題。佢又提到過去係加拿大籍時，出入美國都唔使簽證，依家持有特區護照就需要提前去簽證，排隊同見美國領事館職員，呢啲嘅經歷真係前所未有。