政情：吳得掂嘥公帑飛到盡

吳得掂早幾日出發訪問英國，點知佢搭嗰班航機飛咗六個鐘，竟然因爆玻璃折返，變咗遊飛機河。被問及點解喺任期即將屆滿仲要外訪，仲記得當日佢回應嘅理由係話會不停推動教育工作，原來潛台詞係外訪唔會停就真，事關佢去完英國返嚟幾日，又再飛北京嘞！

八大院校校長多不同行

消息指，「京港高校聯盟」定於本月三十一日至下月一日舉行，主要係由北京同本港部分高校結盟，商討一下學術科研、學生交流等方面嘅合作。為咗推動呢個活動，吳得掂即刻號召八大資助院校校長同各院校校董會主席，齊齊上京出席「京港高校聯盟」。

但消息人士透露，八大校長中，暫只有香港科技大學陳繁昌承諾同行，其他院校則交由副校長代為出席。至於八大校董會主席，則只有六間院校嘅校董會主席同行，嶺南大學同教育大學改由副主席代為出席。睇嚟大學界都唔會好似吳得掂咁，總覺得自己次次都要「親力親為」去外訪，先至夠畀面囉！

只係上京又點會滿足到吳得掂嘅外訪癮呢？傳聞話，吳得掂除咗下星期要上京外，仲計劃喺任期內，去埋深圳、珠海同緬甸，但詳情就未定，似乎佢真係想用盡公帑環遊世界。

新聞秘書回覆避重就輕

據知，去緬甸係同「一帶一路」有關，但究竟點解要喺任期內，趕住去深圳同珠海呢？呢個答案就真係只得吳得掂先知！吳得掂嘅新聞秘書回覆話有關境外公幹行程，教育局會一如既往，喺確定行程後，適時作出公布。

翻查資料，吳得掂自二○一二年上任起至今年三月，共外訪五十四次，總共花咗約三百一十六萬元公帑；而佢上任五年以來，截至今年四月十日，外訪開支所賺取嘅飛行里數達二十一萬六千，足夠兌換七套來回日本嘅機票。