中環出更：葉建源密謀競逐選委揀港大校長
由於港大校長馬斐森喺今年初「劈炮」辭職，港大早前公布下任校長物色委員會，委員會將喺全球物色人選，再由遴選委員會面試及向港大校務委員會提出建議，據知遴選委員會內包括校友代表，八十年代喺港大畢業嘅立法會教育界議員葉建源事先張揚，有意競逐成為遴選委員會內校友代表。
之不過，葉建源能否如願，估計最少要「過兩關」，一來要睇下有冇其他港大校友參選「拗手瓜」，二來下月底選舉之時，係咪得到合資格約十七萬嘅港大畢業生投票支持。
另外，港大畢業生議會常務委員會由廿四名成員組成，換屆選舉今日開始投票，改選常務委員會其中八名成員，選舉結果將喺下月底公布。
畢業生議會常委會今換屆投票
港大校友關注組尋日舉行記者會，宣布將派出三名成員張韻琪、陳家健同施旭成參選，並會聯同另外三名參選校友以及教職員發表共同政綱，包括要求港大校委會盡快公開管治架構檢討報告等。
關注組話若以上六名參選人順利當選，關注組持有嘅席位將增至過半數，將可更有效運用畢業生議會平台，表達校友對港大管治架構檢討同新校長任命嘅關注。
卓妮