有咁耐風流有咁耐折墮，用嚟形容國泰航空最貼切不過。曾幾何時，呢個本地薑航空名牌穩坐全球航空公司一哥寶座，香港人提起都與有榮焉。估唔到國泰近年醜聞多多，特別係內部管理亂七八糟，個朵早就臭晒，依家仲要衰到大裁員cut cost，點止折墮，直頭衰到貼地吖！
國泰今次一口氣剁六百名員工，當中非管理人員更加佔相關職位近兩成，規模係近二十年最大，絕對可以用「血流成河」、「屍橫遍野」嚟形容。國泰總部尋日一片愁雲慘霧，公司如臨大敵，特別聘請保安喺天台巡邏，慎防發生不愉快事件，可想而知情況有幾誇張。今次裁員話就話唔涉及前線地勤員工、機師以及機艙服務員，但工會已經講到明，未來公司會繼續削減資源，睇怕下一波裁員只係時間問題。
最難頂嘅係，國泰講到懶冠冕堂皇咁，話裁員係作為企業精簡轉型嘅一部分，務求更有效作出適時及恰當決策，以便全心專注為顧客服務喎。難為佢哋仲好意思講「適時及恰當政策」。係人都知，國泰之前炒燶期油，蝕超過八十億元，最核心管理層「不合時宜及錯誤政策」闖禍，唔「精簡」佢哋不特止，部分更獲加薪添，返轉頭搵基層員工做替死鬼，仲有冇再離譜啲呀！
至於話全心專注為顧客服務咯喎，更加係侮辱公眾智慧。你知喇，國泰勞資關係惡劣，工會三日唔埋兩日工業行動，次次都搵着乘客嚟搞，雖然今次冇炒到機師同空服員，但員工人心惶惶，難免士氣更加低落，試問點會有好服務，點會有好面口畀乘客睇？咪畀人睇死，再咁落去，國泰遲早好似美國聯合航空咁，暴力掟客落機都似！
呢個正正就係國泰不斷墮落嘅癥結所在嘞。管理層目光如豆，一味識得諗縮數慳成本，座位窄啲、飛機餐質素差啲、機師飛多啲、機艙例行清潔做少啲……人哋就蔗渣價錢做出燒鵝味道，佢哋就啱啱掉轉，收大公司價錢提供差過廉航嘅服務質素，結果唔使問阿貴，係人都買佢哋怕，拍烏蠅咯喎，咪進一步縮皮，「趕客，縮皮，再趕客，再縮皮」嘅惡性循環就係咁嚟。大家有眼見，國泰繼早前公布業績虧損，近日又被剔出MSCI香港指數成分股，有人甚至估國泰仲有排衰，遲吓可能連恒指成分股都被掃地出門添。
始終都係古人講得啱︰禍福無門，唯人自招。國泰淪落到今日咁嘅田地，講到尾都係自己攞嚟。不思進取，坐吃老本，香港人嘅航空公司可以由盛轉衰，成個香港何嘗唔係一樣吖。