政情：公民講場：西九終妥協要錢唔要橋

造價高達三億五千萬元嘅西九藝術廣場天橋，早前遭立法會監察西九嘅聯合小組否決提交工務小組審批後，當局終於「跪低」，喺申請西九綜合地庫嘅第三階段建造工程費用時，剔出天橋餘段部分嘅建設費用，以免「天價天橋」拖慢其他撥款審批，仲透露正與西九管理局全面檢討天橋項目。正所謂無財不行，西九更加係嚴重缺「水」，管理局行政總裁栢志高梗係要錢唔要橋喇，之但係減得一億元咁少，睇怕都好難過關。