律政司喺今年二月正式啟用「電子版香港法例」，取代由一九九七年起向公眾開放嘅「雙語法例資料系統」網站。不過，電子版劣評如潮，多名議員炮轟系統不友善，出現「死link（連結）」、列印時需逐條法例列印等。
議員陳淑莊尋日喺司法及法律事務委員會會議上話，使用新系統列印時，字體、間距會較大，比舊有嘅系統較為浪費紙張。佢話知道政府當局有拍攝短片作教學，建議政府可考慮以較為有趣嘅方式拍攝，甚至請律政司司長粉墨登場。
另一名議員周浩鼎關注系統版本問題，佢話有業界人士向佢哋表示，有關系統嘅手機版本經常用唔到，但喺電腦版本就冇出現同類情況，希望當局能處理。
電子版咁多問題，政府當局回應話現時有提供唔同嘅教學，會喺多媒體影片上考慮有趣嘅方法去做示範。至於列印方面，現時分別有大字版、細字版選擇，但需要配合唔同列印技巧使用，未來計劃會喺網頁上加入唔同嘅列印方法作參考。
香港大律師公會代表亦指出，由於用家習慣使用舊版本，當使用新版本時，會覺得較難用，甚至有時會感到氣餒，但相信假以時日，大家會習慣使用新版本。