政情：莊德仁做玩具生意 跨界合作吸女性顧客
智能手機盛行嘅年代，好多傳統行業都受到衝擊，包括玩具業。做收藏級玩具生意嘅香港中華出入口商會（中出）會董莊德仁（Adran）話，大人嘅玩具市場好難做，小朋友仲難，事關個個都玩手機遊戲，已經好少人買玩具，所以佢都要諗吓計，將市場再細分，最近就同電影公司同本地設計師跨界合作，希望吸納一班女性客。
稱電影人偶市場近飽和
Adran話玩具行業離不開電影，佢都係同電影公司取得授權做人偶玩具，但係電影公司啲戲出得太頻密，經常玩具啱啱做出嚟，又有新戲出，市場都近飽和。最近佢搵本地人氣設計師合作，將獲得授權嘅超級英雄電影主角神奇女俠進行二次創作，結果頗受女性歡迎。
講起玩具，Adran嘅爸爸、「中出」榮譽會長莊成鑫就話自己細個時邊有錢買玩具，用塊布包住啲沙就可以玩餐飽喇！雖然佢唔係做玩具呢行，但當年第一份工都係喺玩具廠做童工o架！