中環出更：陳兆焯感嘆青少無滿足感玩自殘
喺俄羅斯興起嘅恐怖網絡遊戲「藍鯨」（Blue Whale）近日懷疑游到香港，向玩家分發「任務」引導佢哋自殘及自殺，引起大眾憂慮。對於點解自殘遊戲會有人參與？卓妮日前喺活動上見到正生書院校長陳兆焯，佢直言做壞事係過癮嘅，當年輕人生活上搵唔到滿足感，可能就會覺得做壞事甚至自殘有種「人哋唔敢做，我敢」嘅心情，但未必會諗到後果，如果佢哋搵到鍾意做嘅嘢就唔會咁，好似佢有個學生整親隻手冇得射箭，就會知道隻手幾重要，好想快啲好番。
陳兆焯仲自爆曾被個仔投訴唔關心佢，佢以為自己已經係模範Daddy啦，但原來父母問長問短唔算係關心，仔女覺得嘅關心好多時係指「一齊開心一齊玩」嘅時間至真。
呢日國際青年商會香港總會新一屆「十大傑出青年選舉」接受報名，曾獲十大傑青嘅沙田區議員龐愛蘭（Scarlett）就話佢個仔以前都曾經反叛過，作為家長嘅佢會換位思考，諗番如果係自己會想聽啲乜嘢，同埋要畀空間佢哋發洩。早排佢同啲年輕人去咗馬來西亞禪修嘅佢仲話禪修後紓減唔少壓力，心靈都平靜咗，覺得香港學生都可以試吓。
龐愛蘭教仔有心得
講起平日同個仔相處，Scarlett就話阿仔好細個嘅時候，已經常同佢表達媽媽係佢最親密同永遠支持佢嘅人，一路都friend，咁佢有煩惱先會習慣話你知，如果等佢大個咗先嘗試去問佢就唔會講o架喇！
轉頭見到香港中華廠商聯合會副會長徐炳光，佢慶幸阿女自細好鍾意運動，三歲已經跟佢學跳水，所以成長期間將所有精力都用晒喺運動上。佢笑言自己後生都係個曳學生，成日同小思老師頂嘴，但原來一個老師用心真係會令佢改觀，對佢影響好大。
卓妮