中環出更：陳沛然驚「包艇」 定期檢查出席率
定期做身體檢查可以幫助了解個人健康狀況，定期做出席率檢查唔通真係可以確保唔會成為「大懶蟲」？本身係公立醫院醫生嘅醫學界立法會議員陳沛然（Pierre）經常立法會同醫院兩邊走，原來佢為咗唔好顧此失彼，拉低立法會出席率，會定期「檢查」自己喺立法會各個會議嘅出席率，以確保出席率唔會「包艇」喎！
參加5個委員會
Pierre話經常會檢查立法會秘書處提供嘅出席率紀錄，由上任至今一直保持中上水平，有八、九成出席率。為咗唔好令成績太難睇，除咗立法會大會、內務委員會同財務委員會外，Pierre對於參加幾多個事務委員會都有精密計算。根據佢嘅統計，發現議員參加委員會嘅平均數係五個，所以佢亦都參加咗五個委員會，以免畀人話唔做嘢。
改革醫務委員會嘅條例草案喺上屆立法會觸礁，料今屆會捲土重來。Pierre就淡定咁話，估計下半年立法會最大爭議嘅都係高鐵一地兩檢，所以應該燒唔到佢嗰疊。問到會唔會就一地兩檢做業界民調，佢就講笑話不如唔投票，因為不論投贊成、反對或棄權，都實畀人鬧。唔通佢以為斬腳趾真係可以避沙蟲？
卓妮