亨利埋齋叫隊友Keep住團火 東方龍獅大勝入決賽

「亨利」鄭少偉入波,協助東方龍獅昨日於季後附加賽6比1大破南華,將於季後退役的他獲會方送上神秘驚喜,向來眼淺的「亨利」今次以燦爛笑容代替眼淚,揚言要帶動隊友「Keep住團火」,在27日上演的季後賽決賽兼告別戰再下一城。

隊友淋冰水送行 氣氛High爆

衞冕聯賽失敗的東方龍獅與南華今季皆四大皆空,爭奪下年亞冠盃第2圈外圍賽資格成唯一安慰獎。東方龍獅開賽6分鐘便有徐德帥遭南華守衞梁諾恆飛剷中招,其後更需退下火線,卻為球隊換來領先機會,勞高接應鞠盈智開出罰球為東方頂成1比0,該巴西鋒將入球後跑向後備席,高舉鄭少偉的19號球衣致敬。東方龍獅於30分鐘再乘死球機會建功,迪高接應角球頂成2比0,加上麥基及米曹上半場末段入球,遙領南華4球。

易邊後東方龍獅再有迪高於58分鐘藉角球將比數增添至5比0,萬眾期待的亨利66分鐘入替勞高,儘管南華一度有加藤友介「破蛋」,但仍難逃大敗。表現落力的亨利先在73分鐘勁射中楣,完場前更於左路美妙突破,逼得南華門將曾文輝將其撲跌,球證向曾文輝直接出示紅牌及判罰12碼。由於南華換人名額已滿,只能由中場麥高派路域客串把關,亨利親自操刀「冇甩拖」,協助東方完成6比1大勝埋齋。東方職球員賽後穿上印有亨利肖像的特別版T恤致意,亨利更獲隊友淋冰水送行,High爆的他更將T恤拋上看台送給球迷,令現場歡呼聲不絕。

表現交足貨 未改掛靴主意

向來眼淺的亨利難得未有落淚,笑言「留番下場先」:「隊友喺上半場落力爭取入波,似乎真係好想我出場,希望下場繼續Keep住團火,攞番亞冠盃參賽資格,對球會同球迷有個交代。」亨利今場表現寶刀未老,但他堅拒改變掛靴主意,他表示在博得12碼後曾問隊友誰想主射,但全都十分「識做」禮讓給他。對於球會的特別安排,亨利亦蒙在鼓裏:「司徒Sir(副總監司徒文俊)集宿時神神秘秘攞住件波衫叫人簽名,我都估到有啲嘢,但唔知會『搞到咁大』,作為一個小小嘅球員,真係好感動。我每次落場仍然有渴望、努力爭取入波,無論以後仲喺唔喺球圈發展,都希望大家保持團火,比賽有幾多人留意亦要落力去踢表現畀人睇。」

主教練「牛丸」陳婉婷坦言上半場便有兩名主力傷出,一度擔心未能讓亨利落場獻技,而被踢傷的白鶴及徐德帥傷勢不輕,恐未能趕及於決賽披甲,惟望球隊延續士氣爭勝。