美國前總統傑弗遜曾誙講過，如果要喺報紙同政府之間二選一，會毫不猶疑選擇前者。咁又係吖，今時今日呢個政府冇神經冇靈魂，廢到無倫，揭醜揭弊推動社會進步，唔靠好似東方咁嘅正義傳媒克盡第四權天職，仲可以靠邊個吖？
唔係功夫茶賣花讚花香，中大韓籍男生懷疑喺宿舍隊草裸跑兼企圖非禮，東網記者第一時間直擊涉事宿舍保安漏洞，街外人唔單止可以自出自入，仲可以喺男女樓層來去自如，十足十無掩雞籠，結果打針都冇咁快，就喺本報踢爆保安漏洞後，中大宿舍管理部門急急補鑊，規定涉事宿舍地下大堂門口每晚十一點到第二朝八點半關閉，包括宿生在內嘅任何人士均不得出入，而日頭亦只限宿生同埋工友通行。
嗱，有學者就講得啱嘞，韓籍男生裸跑事件令全城震驚，市民難免進一步關注大學宿舍保安，如果唔係東方即時跟進報道，帶嚟輿論壓力，有關方面都唔知幾時至肯正視問題。東方揭露社會陰暗面，迫使有關方面即時做嘢，呢啲咪第四權精神囉！
成件事一清二楚，東方報道既滿足公眾知情權，亦保障學生安全，可惜有啲人唔領情之餘仲一味死撐，又發聲明「譴責」，又發投訴電郵聲稱學生私隱被侵犯，寫投訴信又寫到烏龍百出，搞錯事實寫錯日期白字連篇，連「罔顧」都有本事寫成「岡顧」，完全罔顧辛苦供佢哋讀書嘅父母感受。
話時話，本報踢爆大學宿舍保安管理問題，實在非常必要。近年大學宿舍亂象叢生，迎新活動AV化，欺凌當傳統不在話下，最令人擔心嘅係大學宿舍淪為學生胡作非為嘅「保護傘」，儼然罪惡溫床，試過有港大學生喺宿舍種大麻；有理大學生公然喺宿舍開荒淫派對；至於宿舍內偷竊、偷拍裙底春等事件，更加多到天光都數唔晒。
古人話齋︰少年智則國智，少年強則國強，部分年輕人以為自己真理在手，就可以目空一切，想點就點，校園有乜法子唔烏煙瘴氣，成個社會有乜法子唔七國咁亂？本來呢，年輕人有犯錯嘅本錢，一時走歪路唔緊要，只要有人從旁提醒就得。可惜吖，有啲教育工作者一味鄉願，面對年輕人錯誤唔敢出面指正，反而曲意寬容，講得好聽就沽名釣譽博掌聲，講得難聽直頭誤人子弟。至於嗰啲鼓吹「唔守法唔等於唔尊重法律」歪理嘅所謂教授，直頭枉為人師添喇。
一句講晒，正義傳媒為民喉舌、針砭時弊，幾十年如一日，路見不平一聲吼，天王都無面畀！