立法會調查特首梁振英UGL事件專責委員會，本周一爆出專委會副主席周浩鼎被指同特首辦「打龍通」風波，直至尋日，周浩鼎終於跪低辭去專委會副主席職務，但泛民議員未見收貨，既要求專委會會議公開進行，於陽光下窮追狂打調查到底，預料日後補選委員及副主席，建制泛民亦有新一波角力。專委會主席謝偉俊連日來面對多方壓力，加上要獨自面對傳媒解畫，正所謂「獨力難支」，唔知補選產生嘅副主席能否平安無事，真正成為佢左右手擋下各方嘅明刀同暗箭？
