影響十七萬公務員薪酬嘅薪酬趨勢調查結果出爐，建議高級公務員加薪百分之一點三八，中級公務員加薪百分之二點四四，低級公務員加薪百分之一點八二，按慣例，低級公務員加幅會上調至與中級公務員睇齊，多個公務員團體及工會對加薪幅度初步反應都係唔滿意，與此同時有一個加薪怪現象出現，就係屬於中級公務員頂薪，即第三十三薪點，較高級公務員起薪點嘅第三十四薪點嘅仲要高，兩者相差約一百元。
資料顯示，依家第三十三薪點為六萬五千一百多元，按照加薪建議會上調至六萬六千七百四十元，而第三十四薪點，由六萬五千七百四十元，按建議會增至六萬六千六百四十五元，由此觀之，中級公務員薪酬有可能較高級公務員為高，多出約一百元。
據知以上情況非首次出現，按過去做法，政府會作出適當調整，避免出現高級公務員起薪點，低於中級公務員頂薪點。公務員事務局回覆指，認同上述情況唔理想，唔同薪級表上嘅薪點與對上和對下嘅薪點，其實際金額應維持合理差距；當局續指，行政長官會同行政會議會全面考慮各項因素，以決定公務員薪酬調整方案，包括係咪需要修正個別薪點嘅實際金額。
另外，政府人員協會發表聲明指截至尋晚為止，合共收到約一萬零四百份問卷，約九成七對今次加薪幅度表示不滿意，協會要求政府慎重考慮公務員士氣、挽留人才等因素，調整加薪幅度至不低於百分之四，最終結果係得償所願，定係失望收場，就要視乎行會最後拍板嘞。