政情：大膽蔡素玉 吞食水曱甴
港區人大代表、前立法會議員蔡素玉近年四出體驗異國風情，去到外地當然唔少得要試吓當地美食，蔡素玉自言好多東西都夠膽食，好似最近去完順德同三水，就食咗俗稱「水曱甴」嘅和味龍，佢透露原本諗住只係咬住影吓相，之不過影完之後又唔好意思唔食，所以一下就吞咗落肚嘞；除此以外，同一餐仲有蟬食，但由於太大陣味，佢今次就食唔落。
蔡素玉話自己粗略估計，應該去過超過一百個國家，最鍾意係南美洲，佢憶述今年三月底，曾去過秘魯等南美國家數個星期，大部分時間都係留喺秘魯，仲要食咗當地名菜燒天竺鼠，形容其味道似豬肉。
自爆去親意大利都有艷遇
另一方面，蔡素玉又自爆年輕時每次去意大利都會有艷遇，佢透露，有次於當地等巴士返酒店，見到有個靚仔揸住架靚車，喺佢附近落車後，同佢四目交投，之後個靚仔就入咗一間舖頭飲咖啡，飲完咖啡再上番車，揸架車喺正佢面前停低，問使唔使載佢喎！