政情：「霸」青協逾30年王䓪鳴終讓位

屢捱批 曾捲短樁醜聞

香港有多不勝數嘅青年團體及青年服務機構，但真正落實薪火相傳，政界舊電池交棒予七十後、八十後去作為領導層始終係屬於少數，青協都唔例外，過去三十多年來，總幹事位置一直冇換人，由曾捲入短樁醜聞嘅前房委會主席王䓪鳴擔任，據聞不論青協內外，對於王一直唔願意退落嚟都有意見。

據報王䓪鳴最快今年八月離任總幹事，有傳由現任青協副總幹事何永昌接任。有青協員工向傳媒話，王䓪鳴已經做咗四十二年同青少年有關工作，點都要退下來畀接班人上位。青協發言人接受查詢時話，人事變動有一定嘅程序，佢哋會喺有需要嘅時候再作通知。

曾於青協工作十三年嘅現任社福界立法會議員邵家臻形容，王䓪鳴「唔起身，冇人叫得郁」，又爆料做過王嘅副手，大部分均已退休及離任。邵續稱，王䓪鳴早年因捲入短樁醜聞，據說自此未有踏足天水圍，即使該區有青年中心活動邀請王出席，據報對方最終都冇現身。

除此以外，由王䓪鳴領導嘅青協於二○○九年舉辦青年領袖論壇活動，被轟口講環保實質有份破壞環保，話說當時論壇台上嘉賓大談珠三角環保，但青協卻被出席活動學員踢爆極不環保，大量以單面印製參考資料，浪費逾二萬紙張，狠批王䓪鳴領導嘅青協冇以身作則，培育青年推動環保，青協該次活動負責人最終承認有關做法有疏漏。

青年團體要做到薪火相傳，絕對唔可以光說唔做，成日掛在嘴邊以青年為本，但如果自知已同時代脫節，實在唔應該喺貢獻有限下，繼續霸住高層職位為自己面上貼金，王䓪鳴要出任青協總幹事超過四分一世紀先識退下火線，真係同政圈更新換代嘅大潮流背道而馳，真係好行夾唔送嘞！