中環出更：張仁良賣口乖繼續「吸水」為學生
中華廠商聯合會（廠商會）尋日向香港教育大學捐出港幣二百萬元，並舉行「香港中華廠商聯合會教學室」命名儀式，廠商會會長李秀恒話，至此已完成向全港八間大學捐贈並樹立廠商會招牌嘅工作，教育大學校長張仁良就賣口乖話，要繼續向企業募捐「吸水」，以資助學生到外國開眼界。
講講吓，張仁良諗起當年喺法國讀書時，第一次睇醫生嘅趣事。佢憶述，當年啱啱去法國仲未識講法文，第一次感冒睇醫生，但係醫生又唔識講英文。結果兩人雞同鴨講，只能用身體語言溝通。經此一役，佢深明培養年輕人解決難題能力好重要。所以佢哋設立咗一個基金，資助學生到外國闖蕩，仲話放眼世界唔係只係上吓網就得喎！
講番捐贈儀式，李秀恒有感而發話，記得當初上任時話要捐助全港大學，廠商會內部有唔少反對聲音，有會董仲以書面反映點解要支持佔領行動嘅學生？李秀恒就話，參與佔中只係少數人，其實仲有好多學生需要支持，所以自己捐出一千六百八十萬元注入廠商會旗下嘅社會服務基金，唔理人哋點講，希望盡吓自己責任，始終學生係香港的未來。
啱啱上任兩星期嘅廠商會行政總裁楊立門首次以新身份公開現身，唔知佢適應得好唔好？楊立門語帶輕鬆話，以前喺工貿署做過，加上同廠商會啲人好熟，相信好快熟悉有關情況，好似最近佢哋將聯同城中各大商會，向政府提交有關取消強積金對沖嘅意見。
戴澤良澄清不參選來屆廠商會會長
同場仲有已表態競逐廠商會下一屆會長嘅副會長徐炳光及吳宏斌，外界有傳會加入戰場嘅另一名廠商會副會長戴澤良都喺度。不過戴澤良澄清，呢一次唔會參選，至於再下一屆選唔選就再講喇！
卓妮