係人都知，港府庫房漏油，肥到襪都着唔落，偏偏官老爺最愛哭窮，家陣仲衰到連覓地建屋都玩呢一套，唔係打郊野公園主意，就係反問地從何來，其實港府收埋大把閒置土地，寧願丟空養蚊都唔拎出嚟發展，博乜呢？
呢屆政府時日無多，之但係打郊野公園主意就死心不息，呢次仲搵埋房協過橋「研究」添，點知消息一出，即刻激起唔少爭議，環保團體固然大大聲反對，政客亦批評當局繞過立法會係違反程序，就連房協委員都承認難度唔小，港府嘅如意算盤係咪打得響，真係講唔埋。梗係啦，一方面港人環保意識高漲，發展郊野公園連諗吓都變得「罪大惡極」；另一方面港府發展土地大細超，一味欺軟怕硬，嫌貧愛富，授人以柄咯喎，唔阻力重重至奇。
唔係咩，港府有大把閒置土地，估計有數千公頃，就算撇除發展阻力極大嘅新界棕地，一樣不愁無地可用。本報記者發現，淨係康文署轄下二百多幅臨時休憩用地咋，大部分唔係養蚊，就係養草。好似位於中西區嗰幅吖，位置吊腳，設施簡陋，長年拍烏蠅；又好似屯門另一幅休憩用地，連附近居民都唔知有個咁嘅地方，得物無所用；茶果嶺嗰幅就仲離譜，臨時咗足足三十年，家陣淪為曬衫場。你話嘞，如果官老爺有好好檢視土地用途，重新規劃，又點會造成咁大浪費喎。
仲有呀，全港有近二百幅空置校舍用地，唔少仲係市區靚地，只有少數被改劃房屋用途，大部分一直擺喺度曬太陽，簡直暴殄天物。政府空置宿舍及物業亦不在少數，分布港九新界，生人霸死地都唔知為乜。至於早就成為眾矢之的嘅新界棕地同埋富豪俱樂部用地，港府繼續堅持不收不拆，寧願任由少數人享受及牟利，睇見都眼冤。難為港府高官仲學人下巴輕輕，話收回棕地發展「別無他想」，講咗當做咗，畀人鬧爆就係咁解。大家睇到啦，港府覓地建屋波折重重，反對派從中作梗都係其次，最主要係自己唔爭氣咋。
咁當然，房屋問題積重難返，香港人始終都要面對現實，環保係重要，但有瓦遮頭更加重要，如果呢度唔畀發展，嗰度唔畀起樓，無殼蝸牛永無上樓之日。所以話，發展郊野公園唔係唔得，但其他閒置土地更應優先規劃，最緊要施政公平，咪一味向權貴傾斜至得o架。
點都好，夕陽政府嘅「研究」姿態大於實際，房屋問題呢個燙手山芋始終都係留番下屆處理，新政府係咪「好打得」，係咪幫到港人安居樂業，即管放長雙眼睇吓喇。