政情：亂攞喪事舉例何君堯被圍攻
立法會尋日就《2017撥款條例草案》修正案進行表決，席間再次出現泛民、建制議員互罵場面。議員廖長江話，有議員提出削減回歸二十周年的撥款，質疑佢哋針對回歸活動。議員黃碧雲（一舊雲）就反駁，指回歸的確冇乜好慶祝，直言民主派回歸時期望香港人可以當家作主、實現一國兩制同普選，但如今普選無望，令港人甚為失望，故籲港人七一上街遊行。
議員何君堯就批評一舊雲視慶回歸如搞喪事，直斥其言論無恥，質疑佢屋企若有喪事，係咪又要當喜事辦。呢番言論隨即引起多名民主派議員反駁，議員鄺俊宇指其言論無分寸，有乜可能咁樣話人哋屋企，正常人發言都唔會講及人哋家事，譏諷何君堯精神健康有問題喎！
議員梁國雄亦加入戰團，話何君堯奮鬥廿年嘅最大貢獻，係令香港人明白喺法庭內影相只要求饒就無後果。其後有議員要求主席梁君彥裁決何君堯嘅言論係咪有冒犯性，惟遭拒絕。