政情：楊受成頒授世界傑出華人獎
英皇集團主席楊受成尋日出席「第十五屆世界傑出華人獎」頒獎典禮，並以主禮嘉賓身份頒授獎項予包括香港科技大學校長陳繁昌在內嘅獲獎者。現場逾千人匯聚，設計○八年北京奧運吉祥物福娃而有「福娃之父」之稱嘅藝術家韓美林、香港友好協進會會長戴德豐等人亦有到場，現場十分熱鬧。
表彰熱心投身公益人士
楊受成係世界華人協會永遠榮譽會長，一直積極推動海內外華人嘅交流合作，透過參與社會唔同活動及慈善項目，凝聚全球華人力量，鼓勵更多人熱心投身公益事務。
陳繁昌及李焯芬同獲獎
今次佢向其中三位獲獎者頒發世界傑出華人獎，除咗陳繁昌之外，仲有香港大學饒宗頤學術館館長李焯芬同埋立法會議員劉業強。「世界傑出華人獎」係由世界華商投資基金會創辦，旨在表彰喺世界各地唔同領域中努力不懈、熱心投身公益事務嘅傑出人士。