政情：老屈藝團請黑工 羅健熙抽錯火水
近期入境事務處高調執法，有外國樂手陸續因被懷疑未有申請工作簽證進行表演而被捕或問話。唔少泛民借勢連番批評港府打壓，民主黨副主席羅健熙就點名「老屈」五個演藝團體聘用懷疑非法勞工。不過被羅健熙點名嘅表演者，其實全部有申請所需相關簽證，其中一個被指為「懷疑犯罪人士」更加係香港人，羅健熙今次抽水真係抽中火水喇！
羅健熙喺個人facebook專頁附上一封「致：入境事務處處長」，題為「舉報：懷疑非法勞工」的電郵範本，聲言留意到有非本地人士進行收費表演活動，懷疑呢班人未持有效工作簽證，要求部門果斷執法，打擊懷疑非法勞工罪行。
被羅健熙點名嘅其中兩項係尋日舉行嘅活動，包括廣東歌舞劇院《沙灣往事》以及「法國五月」嘅節目，另外三項則分別在本月底及下月初舉行，包括郭小青獨唱音樂會。羅話懷疑非法勞工問題非常嚴重，明目張膽，視法律如無物咁公開宣傳同埋公開售票云云，仲話郭小青係「懷疑犯罪人士」喎！
所提活動均已申請簽證
我哋了解過，其實佢所提嘅活動全部都已申請合適嘅簽證，郭小青更加係香港人，佢曾經係第一位考入中國音樂學院修讀碩士學位嘅香港學生。唔少心水清嘅網民亦喺羅健熙嘅貼文留言，指郭小青係香港人，點解要申請香港工作簽證？亦有人話法國五月嘅主辦機構係法國駐港澳總領事館，佢哋會集中為慶典期間所有訪港演藝人員申請工作簽證，仲有人反寸羅健熙唔好咁無知，以為人人係非法勞工。
郭小青直言「有少少嬲」
其中一個被老屈嘅香港城市室樂團就批評，羅健熙將各個劇團「拉晒來講」，強調樂團一直跟足程序辦好簽證。郭小青接受查詢時亦稱自己係香港人，坦言對事件「有少少嬲」，指摘羅在未查清楚事件即胡亂撰寫失實貼文，行為有啲幼稚。
羅健熙回應事件時辯稱，係因為質疑有外國樂手遭受政治檢控，才會以有關貼文作出回應。至於郭小青係香港人，佢就話好抱歉。不過講開又講，羅健熙喺同一貼文留言稱，「其實仲有傑志對熱刺，不過我淆底被標籤為打擊本地足球，所以冇喺原文度寫，大家有興趣可以自己加埋入去……」但隨即被網民反駁話，傑志已為熱刺球員申請香港工作簽證。今次羅健熙發文似乎唔係擺烏龍，就係資料搜集不足，未知佢會唔會公開致歉，或者收番言論？