預計明年第三季通車嘅廣深港高鐵香港段，因為「一地兩檢」嘅問題爭議不斷，至今仍未有定案。基本法委員會副主任梁愛詩尋日話有港人擔憂一地兩檢會引起跨境執法問題係過慮，更形容只係搵理由阻礙香港發展。佢解釋，高鐵列車起步慢、到站前又要減速，覺得搞兩地兩檢就發揮唔到作用，仲話西九龍總站係以一地兩檢做概念，若果唔實行，就要炸咗成個總站做重新規劃，咁會嘥晒八百幾億元，反問屆時點樣向港人交代？
