政情：鬍鬚曾輸完回復真我 十問九唔應
坊間有傳特首落選人、前財政司司長曾俊華（鬍鬚曾）有意出戰未來嘅立法會補選，佢尋日出席一個劍擊活動時就被傳媒問及佢未來有乜去向，同埋會唔會參與補選，但係佢就一概唔回應，仲化身成「人肉錄音機」不斷話自己唔識答呢啲問題、淨係會講劍擊嘢喎！十問九唔應，睇怕特首選舉完咗之後，回復番以前做官一樣咁Hea！
拒答會唔會參加補選
早前有消息指鬍鬚曾會夾埋自由黨榮譽主席田北俊、立法會前主席曾鈺成一齊參加補選。鬍鬚曾一到場就被傳媒問佢接下來會唔會參與各個補選同埋佢個人未來去向，但佢只係笑笑口咁話自己唔識答呢啲問題；被問到康文署拒向民陣借出維園為遊行起點事件，同埋覺唔覺得新政府組班遇到困難時，佢就話自己今日淨係會講劍擊，仲話大家嘅話題拉得太遠添！
之後講到佢最耍家嘅劍擊時，佢就盛讚近年香港劍擊基礎訓練做得唔錯，令劍擊運動喺社區有普及化訓練，估計未來香港會慢慢出現劍擊高手。佢認為現時劍擊推廣工作「做得幾好」，因為唔同嘅表演項目可以令大眾更認識何謂劍擊，佢自己未來亦會繼續出席劍擊活動，之後亦會繼續返母校教劍擊喎。