政情：張秀賢吸范國威叛將 本土打本土

范國威同張秀賢都唔係乜嘢新面孔，范國威曾經參與本屆立法會選舉，選舉當日就發現本身係新同盟嘅丘文俊、陳兆陽同趙柱幫等三名區議員突然倒戈、支持另一候選人，三人之後更加退黨。范國威最終取得三萬多票，得票排名第十一，連任失敗，而游、梁因宣誓風波而被取消議席，范國威當然吼實補選呢個或令佢提早重返立會嘅機會。

張放風有唔少民主派議員支持

一直蠢蠢欲動嘅張秀賢，多次接受訪問時都話自己可以連結泛民同本土，更放風話唔少民主派區議員表明支持自己出選，但佢之前嘅戰友，好似學民同學聯就無人撐佢。尚未公布有乜班底之際，早前就傳出已退出新同盟嘅丘文俊、陳兆陽同趙柱幫，喺上次選舉支持嘅鄭家富亦唔會參與補選，反而支持張秀賢，咁啱張秀賢尋日母親節就同丘文俊等三人，仲有傘兵黎梓恩擺街站，令到傳言似層層咁。

事隔幾個鐘頭，事情又再峰迴路轉。鄭家富接受查詢時否認對參與補選一事已有任何決定，更強調無意圖支持任何人，對於傳言非常詫異；而黎梓恩接受查詢時亦否認支持張秀賢出選，話有初選機制同政綱先決定支持邊個。

另外，亦有傳言指范國威曾經希望列席民主派會議，討論一下補選安排，但范國威始終唔係議員，參與會議並不適當，最終被拒。范國威接受查詢時否認要求過列席會議，仲話補選有排未舉行，唔明點解有呢啲傳言。

老實講，無論泛民同建制政黨都想攞到呢個席位，尤其張秀賢同范國威已表明有意參加補選，一個小動作都會惹起好多揣測，依家補選都未知幾時舉行已謠言滿天飛，好明顯係有人興風作浪，製造矛盾，睇怕臨近補選，情況就會更加混亂，惡鬥連場。