中環出更：攀山涉水訪正生考驗菁英體能
「港孩」現象普遍，愈來愈多嬌生慣養嘅小朋友出現，早前菁英會參觀位於大嶼山芝麻灣嘅全亞洲唯一戒毒學校基督教正生書院，體會學生喺惡劣環境下學習同生活，鍛煉意志及體能。菁英會主席盧金榮感慨現時社會富裕，但係孩子能力反而退步，要多帶佢哋體驗及經歷至得，運動係其中一種鍛煉。
呢日入去參觀嘅菁英會成員雖然後生，但就唔係「港孩」，事關佢哋攀山涉水由中環去長洲再駁船去芝麻灣，於烈日當空下步行近二十分鐘山路，先至去到「校舍」。
正生校長陳兆焯話，學生需要嘅其實係一個機會，佢哋有學生入去時，連鞋都唔識着，話兩句就喊，但喺咁簡陋嘅校舍入面生活一段時間後，個個都變成越野高手。正生仲為學生安排唔同訓練，包括攝影、彈琴、剪頭髮及射箭等，有舊生喺法國深造色士風及讀大學畢業，亦有學生跟攝影大師學習拍攝全城街馬等大型活動工作，學生就業率近九成。
講起教學軼事，陳兆焯透露曾有學生喺校內違規經營「私房菜」、自製「紋身機」，又有學生於細小嘅洗澡池學游水。現時正生校舍設施仍簡陋，學生早上須排隊去臨時廁所，輪流抬石油氣及物資上山，煮八十幾人分量嘅膳食及學習船隻維修等。
王詩雅雲南住兩年學採茶
負責今次活動嘅菁英會執委王詩雅就諗起，當年為咗學採茶，曾經於雲南西雙版納景邁山住咗兩年，朝朝五點起身由低做起，學習茶葉製作過程，難怪呢日佢見到路上昆蟲仍處之泰然。
卓妮