真係講嘅唔厭，聽嘅都厭。梁游兩隻港獨小學雞尋日被警方以涉嫌非法集結上門拘捕，深深不忿唔在講，仲例牌搬出「民選議員」神聖不可侵犯呢三幅被做遮羞布，有冇再老土啲吖。
出得嚟行預咗要還。梁頌恆同游蕙禎去年底鬧出宣獨辱華風波，人神共憤，唔畀佢哋再入立法會搗亂就梗嘅喇，點知有人唔捨得高薪厚祿，係都要帶埋班蝦兵蟹將衝擊立法會，以為咁就可以博懵喎，卒之咪畀警察拉囉。最惡頂係，兩隻小學雞又搬出民選議員說事，話議員言論受立法會權力及特權法保護，進入立法會天公地道，今次檢控係政治打壓喎，擺明死雞撐飯蓋喇。
冇錯，有關條例的確保障議員喺議會內嘅言論自由，但不包括肢體自由，衝擊立法會兼賴死，唔係犯法係乜呀，何況宣獨辱華已遠超底線，就算換咗喺西方國家一樣冇情講，唔信睇吓德國，邊個提倡納粹，邊個隨時拉得，證明言論自由唔係大晒。兩隻小學雞不學無術，滿口歪理仲以為自己好正義，神憎鬼厭仲以為自己好偉大，終於搞到債務纏身兼官司纏身，唔衰攞嚟衰。
係人都知，港獨之所以甚囂塵上，激進分子之所以愈來愈無法無天，都係拜一班無良政客所賜。港獨脫胎自佔中之亂，係所謂「不守法不等於不尊重法治」同埋「違法達義」嘅延續，部分年輕人被歪理洗腦，仇中仇到失心瘋，以為做乜都冇後果，結果淪為政治炮灰，死咗都唔知咩事，你話係咪可憐復可悲吖。
嗱，咪以為港府將九名佔中搞手落鑊係好威水呀，其實都係做吓樣嘅咋，如果唔係點會拖足兩年幾都未輪到幕後黑手落鑊喎。唔係咩，兩隻小學雞去年底犯事，尋日就又拉又鎖，但被視為佔中金主兼總指揮嘅壹傳媒老闆漢奸黎，到家陣仲係鬆毛鬆翼，毫髮無損，當局檢控效率因人而異，一樣違法兩樣處理，呢啲咪叫同人唔同命囉。
咁講喇，小學雞有名你叫小學雞，惡極有個譜，但漢奸黎呢隻老狐狸就唔同講法，為反中亂港出錢出力不特止，仲有大班反對派政客聽佢支笛，齊齊搞亂檔攤，香港無日安寧就係咁解。喂，香港自詡法治之區喎，點解對呢班友束手無策？道理一字咁淺，咪就係有人狐假虎威囉，漢奸黎有外部勢力撐腰，有恃無恐，而港府「懼外症」病入膏肓，結果咪任得佢逍遙法外囉。
一句到尾，香港淪為蛇蟲鼠蟻嘅溫床，根源就係港府崇洋懼外，欺善怕惡，一味向班蛋散埋手，對住蛇頭就腳軟手震。計功夫茶話齋，打蛇七寸，擒賊擒王，港府係咪真正撥亂反正，法律面前係咪真正人人平等，大家拭目以待！