政情：馬逢國運動衫加老西開會

健身中點人數 成身汗趕返去

喺立法會大樓設有健身室畀議員使用，而尋日其中一次點人數期間，就見到馬逢國身穿短袖恤衫，兼且滿頭大汗匆忙抵達會議廳，仲邊行邊着西裝褸添！

點解搞到咁狼狽？佢就透露，本身做緊運動，仲搞到一身大汗，但因點人數關係，佢需要趕緊喺運動裝外着西褲同西裝褸，佢形容成身「濕淋淋」，所以點完人數之後，佢仲要趕返去沖身。

佢仲講解身穿嗰套運動服裝，話係過去主禮體育活動時嘅紀念品，因為有領嘅關係，外加一件西裝褸就可以去開會，特別係對只要五分鐘時間嘅投票階段，更為方便。不過，運動衫係方便，但亦為佢帶嚟煩惱，事關佢屋企積累大量出席活動所獲贈嘅運動恤衫，數量多到要考慮捐出去。