政情：葉劉着衫着到舊患復發
香港人生活繁忙，不時都要喺辦公室對住電腦工作，若果工作姿勢唔正確或經常着高跟鞋，都有機會引發坐骨神經痛。好似立法會議員葉劉淑儀（葉劉）咁，尋日因為着衫嗰陣唔小心扭親手，最終搞到多年前嘅坐骨神經痛舊患復發，返到立法會開會，唔單止坐立不安，仲舉步維艱添！稍後要去做針灸治療。
扭親手致坐骨神經痛
尋日見到葉劉拐吓拐吓咁行入會議廳開會，細問下先知道佢因為朝早着衫時扭親手，令坐骨神經痛舊患復發。佢話自己早年同個女喺美國深造嗰陣已經患上坐骨神經痛，由腳部一直痛到盆骨位置，痛到連去大學上堂都要個女為佢攞書包同揸車，連出門都有困難！雖然佢接受過唔同嘅治療，但療效都始終唔係好顯著。
後來有唐人街嘅華人認得佢，仲介紹佢去搵保安局前局長黎慶寧嘅表妹針灸，經過多月治療後終於康復。佢又話，其實針灸治療喺加州、三藩市都已經相當流行，唔少唐人街都有針灸治療嘅地方，但今次舊患復發就唔會專程去美國針灸，事關早前已經有區議員同事向佢推薦針灸師傅，過幾日得閒啲就會去做針灸嘞！